Ziara yenu ikazae mbinu mpya utekelezaji program ya ECO-SCHOOLS -Kaimu DED Mufindi DC

Posted on: September 22nd, 2025

Walimu wa shule za msingi na sekondari zinazotekeleza program yaa ECO-SCHOOLS wametakiwa kutumia fursa ya ziara ya kutembelea shule zote zinazotekeleza program hiyo kujifunza na kubadilishana uzoefu wa namna ya utekelezaji wa program hiyo kwa lengo la kujifunza mbinu mpya zenye tija ili kupata mafanikio na kuleta tija katika shule zao.

Rai hiyo imetolewa na Kaimu Mkurugenzi wa Halmashauri ya Wilaya ya Mufindi Ndg. Gilbert Ngailo wakati wa mapokezi wa timu ya walimu wa shule zinazotekeleza program ya ECO-SCHOOLS kutoka Halmashauri tatu za Mkoa wa Morogoro na Halmashauri ya Mufindi wakiwa ni wenyeji ambapo amewataka walimu hao kutumia nafasi hiyo kujifunza zaidi ili kuongeza uelewa na kubadilishana uzoefu kupitia shule walizotembelea na watakazotembelea hususani katika Halmashauri ya Wilaya ya Mufindi.

Akijivunia matunda yatokanayo na utekelezaji wa program ya ECO-SCHOOLS Afisa Elimu Sekondari Ndg. Daniel Mapilya amesema program hiyo imetekelezeka na kuzaa matunda makubwa kwani shule zote zenye program hiyo zimekuwa mfano wa kuigwa katika utunzaji wa mazingira na uzalishaji wa chakula katika mazingira yao kwa shule ambazo hazina mradi, huku akitoa ombi kwa uongozi wa program hiyo kuongeza wigo wa uwezeshaji wa utekelezaji wa program hiyo hususani katika Halmashauri ya Mufindi ili ziweze kuzaa matunda na kuwa mfano wa kuigwa na Halmashauri nyingine.

Akieleza lengo la ziara hiyo na namna program inavyofanya kazi katika sekta ya elimu Afisa Program ya ECO-SCHOOLS Ndg.Francis Mkumbi toka shirika la TFCG amesema program hiyo inafanya kazi na Halmashauri nne ikiwemo Mufindi, Mvomero, Morogoro Vijijini na Kilosa ambapo lengo la ziara ni kuona namna shule zinavyotekeleza program hiyo katika kupunguza na kukabiliana na mabadiliko ya tabianchi lakini pia mbinu za kuongeza uzalishaji wa chakula shuleni kwa kutumia rasilimali mbalimbali.

Kwa upande wake mratibu wa program ya ECO-SCHOOL kwa Halmashauri ya Wilaya ya Mufindi Bi. Scola Sanga amesema program hiyo ilianza kufanya  kazi toka 2017 hadi sasa ikiwa inafanya kazi ya kujali mazingira na elimu bora kwa maendeleo endelevu ikitekelezwa kwa shule za sekondari na msingi ambapo upande wa elimu msingi inafanya kazi katika shule ya Mhemi, Ifwagi na Kitelewasi huku upande wa Sekondari inahusisha shule ya Mdabulo na Igowole.