HAKIKISHENI MAREJESHO YANAFANYWA KWA MWITIKIO MKUBWA - DAS MUFINDI

Posted on: September 25th, 2025

Wanavikundi vya wanawake, vijana na wenye ulemavu  waliopata mikopo ya 10% wametakiwa kuwa na mwitikio mkubwa wa kufanya marejesho ya mikopo hiyo kwani fedha hizo ni za mzunguko zinazopaswa kutumikwa kujikwamua na kurejeshwa kwa wakati ili ziweze kusaidia vikundi vingine kwa kuhakikisha kila kikundi kinajibidiisha na kutekeleza mradi wake kama ilivyokusudiwa.

Rai hiyo imetolewa na Katibu Tawala Wilaya Ndg. Reuben Chongolo kwa niaba ya Mkuu wa Wilaya wakati wa hafla ya makabidhiano ya hundi ya kiasi cha shilingi 1,015,224,500.00 kwa vikundi hivyo ambapo amesisitiza marejesho kufanyika kwa wakati jambo litakalosaidia upatikanaji wa fedha nyingine kwa ajili ya vikundi vingine ambavyo vinahitaji kupatiwa mikopo ya 10% ili viweze kujikwamua kiuchumi.

Hafla hiyo iliyoambatana na ugawaji wa vipaza sauti kwa maafisa maendeleo ya jamii waliko kwenye kata ambapo vipasa sauuti 10 vimekabidhiwa kwa kata 10 ikiwa ni awamu ya kwanza ambapo amewasisitiza maafisa hao kutumia vitendea kazi hvyo kama ilivyokususduiwa na Serikali ikiwemo kuendelea kutoa elimu na ushauri wa kitaalam hususani kwa wanavikundi na wananchi katika uchaguzi wa maandiko ya miradi illi waweze kuchagua miradi inayotekelezeka jambo litakalosaidia usimamizi  na urejeshaji wa mikopo.

Kwa upande wake Kaimu Mkurugenzi wa Halmashauri ya Wilaya ya Mufindi ambaye pia ni Afisa Maliasili Wilaya Ndg. Gilbert Ngailo amewataka wanavikundi waliopata mikopo kuzingatia taratibu na sheria katika uendeshaji wa kila mradi ulioainishwa ikiwemo kuhakikisha wanakuwa na leseni za uendeshaji biashara na umiliki wa vyombo vya moto huku akisisitiza urejeshaji wa marejesho ya mikopo hiyo kwani wana dhamana ya kurejesha.

Akisoma taarifa ya mikopo ya 10% Mkuu wa Divisheni ya Maendeleo ya Jamii Ndg. Sebastian Kaole amesema Halmashauri ya wilaya ya Mufindi imeendelea kuratibu Mfuko wa Maendeleo ya Wanawake,Vijana na Watu Wenye Ulemavu kama sheria na kanuni zinavyoelekeza.kwa kutenga asilimia 10 ya mapato ya ndani kwa ajili ya makundi matatu ya vikundi vya wajasiriamali Wanawake, Vijana na Watu Wenye Ulemavu ambapo jumla ya shilingi 1,015,224,500.00 zimetolewa kwa vikundi 98, kati ya hivyo 48 vikiwa ni vya Wanawake, 38 vya Vijana na 12 vya Watu Wenye Ulemavu.

Kwa niaba ya wanavikundi wote Bi. Mgeni Kalinga ametoa shukrani kwa Serikali na uongozi mzima wa Halmashauri na Wilaya kiujumla kwa huku akiwakumbusha wanavikundi wenzake kuhakikisha wanajenga Imani kwa Serikali kwa kufanya marejesho kwa wakati illi waweze kuaminika na kukopesheka zaidi.