Mufindi DC yajikita zaidi kupunguza vifo vitokanavyo na changamoto za uzazi

Posted on: July 14th, 2025

Halmashauri ya Wilaya ya Mufindi imeendelea kuweka mikakati mbalimbali katika kuhakikisha inapunguza kwa kiasi kikubwa idadi ya vifo vya uzazi na watoto wachanga ambapo miongoni mwa mikakati hiyo ni kuwakutanisha wataalam wa afya hususani wanaotoa huduma kwa kinamama na watoto lengo ikiwa ni kuwajengea uwezo wa namna ya kutoa huduma na ushauri kwa kinamama wajawazito na watoto kwa kipindi chote cha uzazi.

Hayo yamebainishwa na Katibu wa Afya Bw. Ernest Lumeya kwa niaba ya Mganga mkuu wakati wa ufunguzi wa kikao hicho ambapo amesema kuwa kikao hicho cha siku moja kinatarajiwa kuwa na tija kwa wataalam ikiwemo kukumbushana kuzitambua dalili za hatari kwa kinamama wajawazito, zinazoweza kuepukika kwa kuchukua hatua stahiki kwa kinamama na watoto ili kuepuka vifo vinavyoweza kuepukika.

Mratibu wa huduma za Afya ya uzazi na mtoto Bi.Rehema Simangwa amesema miongoni mwa sababu za uwepo wa vifo vya uzazi na watoto wachanga ni kutokwa na damu nyingi wakati wa kujifungua, kifafa cha mimba, uzazi pingamizi na wajawazito kuchelewa kufika kwenye vituo vya kutolea huduma mara uchungu unapomuanza, huku upande wa vifo vya watoto wachanga ni mtoto kufia tumboni, mtoto kuzaliwa amechoka, watoto wanaozaliwa njiti na kukosa huduma kwa haraka pamoja na mtoto kuzaliwa na ulemavu.

Bi Rehema amesema kwa kipindi cha Aprili – Juni 2025 Halmashauri  imepokea vifo 5 vya watoto wachanga na upande wa kinamama hakuna kifo kilichotokea huku akisema kuwa kupitia vikao hivyo vimekuwa na tija kwa wataalam kujengeana uwezo ambao hutumia utaalam huo kuwasaidia kinamama kupunguza vifo vya wazazi na watoto wachanga.