Ufaulu Elimu Msingi Halmashauri ya Mufindi Waendelea Kustawi Wafikia Asilimia 90.64

Posted on: February 12th, 2020

Halmashauri ya Wilaya ya Mufindi kwa miaka mitano mtawalia imeendelea kupandisha ufaulu wa wanafunzi wanaohitimu darasa la saba, kutoka asilimia 68.2 mwaka 2014, hadi kufikia asilimia 90.64 mapema mwaka jana 2019.

Takwimu hizo zimetolewa na Mkuu wa idara ya Elimu Msingi Kenedy Bukagile, wakati wa kikao cha tathimini ya mtihani wa kumaliza Elimu msingi kwa mwaka 2019, kilichowakutanisha Walimu Wakuu wa Shule zote za msingi pamoja na Maofisa Elimu kata kutoka Kata 27 za Halmashauri.

“Ndugu Mgeni rasmi, kwa miaka mitano mfurulizo ufaulu wetu unazidi kupanda, ambapo, mwaka 2014 tulifaulisha kwa asilimia 68.2, mwaka 2015 asilimia 80.39, mwaka 2016 wahitimu wetu walifaulu kwa asilimia 84.9, mwaka 2017 asilimia 84.26, 2018 asilimia 86.73, wakati mwaka jana 2019 ufaulu ulipanda na kufikia asilimia 90.64” alitanabaisha Bukagile.

Mkuu huyo wa idara ameongeza kuwa, mafanikio hayo yametokana na mikakati inayowekwa na idara yake kupitia vikao vya tathimini vinavyofanyika kila mwaka na kubainisha baadhi ya mikakati kuwa ni pamoja na utoaji wa chakula cha mchana shuleni sanjari na uwepo wa kambi za masomo.

Mgeni wa heshima katika hafla hiyo ambaye ni Mwenyekiti wa Halmashauri ya Wilaya ya Mufindi Mhe. Festo Mgina, amewaagiza viongozi hao kundelea kutekeleza suala la utoaji chakula cha mchana kwa kuwahamasisha wazazi kuchangia kwa mujibu wa sera ya Elimu pasipo malipo.

“Hata hivyo, ninawaagiza kutoshiriki kuchangisha michango yoyote bali jukumu la utoaji chakula lisimamiwe na serikali za Vijiji na si vinginevyo kwani utoaji wa chakula huleta usawa kwa walionacho na wasionacho"

Mkuu wa Idara akisoma Takwimu za Ufaulu

Picha ni Baadhi ya Maofisa Elimu Kata na Walimu wakuu