RC HAPI, aridhishwa na Maendeleo ya Ujenzi Kituo cha Afya Ifwagi

Posted on: January 7th, 2019

RC HAPI, aridhishwa na Maendeleo ya Ujenzi Kituo cha Afya Ifwagi

Mkuu wa Mkoa Iringa Mhe Ally Hapi mapema leo hii amefanya ziara yake ya kwanza kwa mwaka 2019 Katika Halmashauri ya wilaya Mufindi ikiwa ni siku ya tatu baada ya mwaka mpya na kukagua baadhi ya miradi ya maendeleo inayotekelezwa Wilayani humo hususani Ujenzi wa Kituo cha Afya Ifwagi.

“Nimeridhika, nimefarijika kuona kwamba ujenzi uko kwenye hatua nzuri, Nikupongeze Mkuu wa Wilaya, Mkurugenzi na Timu yako kwa kusimamia vyema viwango elekezi na vyenye ubora katika ujenzi huu wa Kituo hiki cha afya Ifwagi ikiwa ni pamoja na kasi kubwa ya kuhakikisha ujenzi huu unamalizika kwa wakati ili wananchi ndani ya mwaka huu waanze kupata huduma za afya katika kituo hiki” Alisema.

Ujenzi wa kituo cha afya Ifwagi ulianza mwaka jana 2018 baada ya kupokea fedha kutoka serikalini kiasi cha shilingi Milioni 400 kwa ajili ya ujenzi huo chini ya Progam maalumu ya kushirikisha nguvu za wananchi yaani Force Account kwa kutumia wataalamu wenyeji wa eneo husika kwa lengo la kupunguza gharama za ujenzi lakini pia kuwa na ujenzi imara na wenye ubora wa hali ya juu.

Aidha katika ujenzi huo umeenda sambamba na nyumba ya Mganga ambayo nayo iko mwishoni kumalizika kwa lengo la kurahisisha upatikaaji karibu wa wataalamu wa Afya ili kurahisisha utoaji huduma bora za afya kwa wananchi katika kipindi cha muda wote wa masaa 24.

Kituo hicho cha afya kinatarajiwa kukamilika mwaka huu na kitaanza kazi ya kuhudumia wananchi wa Ifwagi na kata zake kwa lengo la kusogeza huduma za afya jirani na wananchi ikiwemo huduma za upasuaji mdogo, kliniki ya afya ya mama na mtoto, wodi za kulaza wagonjwa huduma za kinywa na meno na nyingine zote muhimu.

Mkoa wa Iringa ni moja kati ya mikoa inayotekeleza ujenzi wa vituo vya afya takribani 8 ambavyo vyote vinaendelea vizuri na mara baada kumalizika basi serikali itamalizia kwa kununua vifaa tiba ikiwa ni pamoja na madawa kupitia bohari kuu ya dawa MSD tayari kwa matumizi ya Wananchi kwa ajili ya kuboresha afya zao.