Rasmi Halmashauri ya Mufindi Kuanza Ujenzi wa Ofisi Kuu

Posted on: November 5th, 2021

Rasmi Halmashauri ya Mufindi Kuanza Ujenzi wa Ofisi Kuu Itulavanu

Halmashauri ya Wilaya ya Mufindi imetiliana saini na Kampuni ya ujenzi ya Chuo Kikuu cha Sayansi na Teknologia cha Jijini Mbeya (MUST) ili kujenga jengo la Makao Makuu ya Halmashauri katika Kijiji cha Itulavanu Kata ya Ikongosi likalotumika kama Ofisi kuu za Halmashauri.

Hafla fupi ya kusaini kandarasi ya ujenzi, imefanyika leo Tarehe 23/10/2021 katika Ukumbi wa Halmashauri (Bomani) na kuongozwa na Mwenyekiti wa Halmashauri ya Mufindi Mhe. Festo Mgina na Mkurugenzi mtendaji Bi. Zaina M. Mlawa.

Jengo hili la kisasa lenye hadhi ya ghorofa moja na litakalokidhi mahitaji ya Idara na Vitengo vyote lakini pia likiwa na Ukumbi wa Mikutano, linajengwa kwa gharama ya zaidi ya Milioni 264 ikiwa ni kandarasi ya siku 120 wakati vifaa vyote vya kuwezesha ujenzi huu vinanunuliwa na Halmashauri yenyewe kupitia taratibu za manunuzi kwenye Ofisi za umma.

 Shukrani kwa Serikali kuu chini ya uongozi wa Rais Samia Suluhu Hassan, iliyotoa kiasi cha shilingi Bilioni moja za awali ili zitumike kuanza ujenzi huu na kuhakikisha watumishi wanatekeleza wajibu wao wa kuutumikia umma katika Mazingira bora hivyo kuinua ari ya utendaji kazi kwa juhudi na maarifa.