Mufindi yazidi kupaa ukusanyaji mapato ya ndani

Posted on: February 3rd, 2025

Baraza la madiwani limeipongeza Halmashauri ya Wilaya Mufindi kwa kuongeza mapato kupitia vyanzo tofouti ikiwemo uwepo wa mageti katika njia zote kwa ajili ya kudhibiti utoroshaji wa mapato yote, kwa sasa hali ya ukusanyaji mapato imefikia shilingi milioni 170 kwa  wiki tofauti na kipindi cha nyuma ambapo makusanyo yalikuwa shilingi milioni 80 kwa wiki.

Akiongoza baraza la madiwani Mwenyekiti wa Halmashauri ya Wilaya ya Mufindi Mh. Festo Mgina amesema kuwa hali ya ukusanyaji wa mapato imeongezeka kwani kwa sasa kumekuwa na kasi ya ukusanyaji wa mapato jambo litakalosaidia Halmashauri kuendelea kutekeleza miradi yake kwa kupitia fedha za mapato ya ndani.

Sanjari na hayo amesema  ndani ya Halmashauri kuna baadhi ya maeneo yana madini ambapo uwepo wa madini hayo unaweza kutumika kama chanzo cha mapato, hivyo amewataka wataalamu kufuatilia kwa kina zaidi chanzo hicho ili kiwe chanzo kizuri cha mapato.

Kwa upande wake Mkurugenzi Mtendaji wa Halmashauri ya Wilaya ya Mufindi Ndg. Mashaka Mfaume amebainisha mikakati mbalimbali inayotumika katika ukusanyaji wa mapato ikiwemo uwepo wa mageti kwa ajili ya kudhibiti utoroshwaji wa mapato, uwepo wa doria nyakati zote, ushiriki wa timu ya manejimenti kwenye doria za masaa baada ya kazi, ushirikishwaji wa wataalam kwa kupatiwa motisha kwa wote wanaotoa taarifa na kufanikisha kukamatwa kwa watoroshaji wa mapato na wasiolipa ushuru na malipo stahiki.

Aidha katika kufanikisha kasi ya ukusanyaji mapato Mh. Mgina kwa kushirikiana na Mkurugenzi Mtendaji wametoa rai kwa waheshimiwa Madiwani kuongeza chachu katika ukusanyaji wa mapato na kuleta maendeleo ya ujumla kwa halmashauri lakini pia kuendelea kuhamasisha wananchi kuendelea kuchukua tahadhari na kijikinga dhidi ya maambukizi mapya ya virusi vya UKIMWI.