MHE. KIHENZILE APONGEZA JUHUDI ZA WADAU KATIKA KUMKOMBOA MTOTO WA KIKE

Posted on: July 4th, 2024

Naibu Waziri wa Uchukuzi ambaye pia ni Mbunge wa Mufindi Kusini Mhe. David M. Kihenzile ametoa pongezi kwa shirika la SAWA Wanawake Tanzania kwa kuendelea kuunga mkono juhudi za Serikali katika kuboresha miundombinu ya elimu ikiwemo kuhakikisha mtoto wa kike anafikia ndoto zake ambapo shirika hilo kwa kushirikiana na wadau mbalimbali limefanikisha ujenzi wa bweni kwa wanafunzi wakike katika shule ya Sekondari Kasanga katika kata ya Kasanga.

Mhe. Kihenzile ametoa pongezi hizo Juni 4, 2024 wakati wa hafla ya kuzindua bweni hilo ambapo ameupongeza uongozi wa SAWA, Uongozi wa Halmashauri  ya Wilaya ya Mufindi pamoja na wananchi kwa juhudi kubwa na ushirikiano waliounyesha katika kuhakikisha bweni hilo linakamilika na kuanza kutumika.

Bweni hilo lililogharimu zaidi ya shilingi milioni 138 kwa michango toka kwa wadau mbalimbali ambapo shirika la SAWA kwa kushirikiana na Coastward Foundation wamechangia shilingi milioni 1.8, Halmashauri ya Mufindi milioni 20, nguvu za wananchi shilingi milioni 7.5 huku mbunge huyo akichangia shilingi milioni 2.4, ambapo kukamilika kwa bweni hilo kutaongeza ufaulu, kuwajengea mazingira na muda mzuri wa kujisomea pia litawasaidia wanafunzi wa kike kuondokana na mimba za utotoni.

Aidha Naibu Waziri huyo, ameupongeza uongozi wa Halmashauri ya Wilaya ya Mufindi hususani Mwenyekiti wa Halmashauri na Mkurugenzi Mtendaji kwani wamekuwa ni viongozi wasikivu, mfano wa kuigwa na wenye ushirikiano katika kuhakikisha Halmashauri ya Mufindi inakuwa na maendeleo.

Kwa upande wake Kaimu Mkurugenzi Mtendaji wa Halmashauri hiyo ambaye ni Afisa Elimu Sekondari Ndg. Daniel Mapilya amewapongeza wadau na wananchi wa kata ya Kasanga kwa kujitoa kwao kwa hali na mali ili kukamilisha ujenzi huo huku akitaka bweni hilo kuanza kutumika ili kupata matokeo yenye tija.

Kwa upande wake Diwani wa kata hiyo ya Kasanga Mhe. Costa Ng’umbi kwa kushirikiana na Mkuu wa shule ya sekondari Kasanga Bi. Monica Ng’amilo wameshukuru kwa kukamilika kwa ujenzi huo na wamepongeza  jitihada zinazoendelea kutekelezwa na Serikali huku wanafunzi hao kwenye risala yao wamesema uwepo wa bweni hilo litawaepusha na changamoto mbalimbali ikiwemo mimba za utotoni, utoro jambo linaloathiri maendeleo ya taaluma.