DK. Mwanjelwa :Tunandaa bei elekezi ya Pareto, Chai ili kuwainua Wakulima Kiuchumi

Posted on: December 7th, 2017

DK. Mwanjelwa: Tunandaa bei elekezi ya Pareto, Chai ili kuwainua Wakulima kiuchumi

Naibu Waziri wa Kilimo Dk. Mary Mwanjelwa, amesema  Serikali ipo katika hatua za mwisho za kukamilisha mchakato wa kuweka bei elekezi kwenye mazao  ya Chai na Pareto  kwa shabaha ya kuinua kipato cha  Wakulima wanaojishughulisha na Kilimo cha Mazao hayo nchini.

Naibu Waziri amebainisha hilo, wakati wa ziara ya kikazi Wilayani Mufindi, alipotembelea Kiwanda cha chai cha MTC kilichopo Kijiji cha Itona Halmashauri ya Wilaya ya Mufindi sanjari na kiwanda cha kuchakata Pareto kilichopo Mjini Mafinga.

Dk. Mwanjelwa amesema, uwepo wa bei  elekezi utasaidia kuwainua kiuchumi wakulima wa mazao hayo  kwani kwa muda mrefu wamekuwa wakilalamika kuwa wanunuzi wa mazoa yao ambao ni wawekezaji wa viwanda vya sekta hiyo, wamekuwa wakinunua malighafi hizo kwa bei zisizoendana na gharama pamoja na muda waliotumia kuzalisha mazao hayo.

 “Serikali inataka kuona kila mmoja anafaidi kadri anavyostahiki, lengo ni Mkulima apate anachostahili kulingana na alichopanda, Serikali ipate kodi yake kama inavyostahili na Mwekezaji apate faida yake kulingana na uwekezaji wake, tuwasaidie tuwainue wakulima hawa kwani bila malighafi kutoka kwao, hakuna kiwanda”

Aidha, Mh. Naibu waziri ametoa rai kwa wakulima nchini kuimarisha umoja wao kupitia vyama vya ushirika ili wawe na nguvu ya kusimamia maslahi yao hususani bei za kuuza mazao kwa wanunuzi wa mazao yao.

Tanzania ni nchi ya kwanza kwa kulima zao la Pareto barani Afrika na ni ya pili duniani ikitanguliwa na Australia.