Baraza la Madiwani Mufindi Laweka Mikakati Ya Kulitangaza Bwawa La Maajabu La Mpanga Tazara.

Posted on: February 4th, 2019

Baraza la Madiwani Mufindi Laweka Mikakati Ya Kulitangaza Bwawa La Maajabu La  Mpanga Tazara.

Baraza la Madiwani la Halmashauri ya Wilaya ya Mufindi Mkoani Iringa ,limepitisha azimio la  mpango mkakati wa kuongeza vyanzo vya   mapato kwa kukitangaza rasmi kivutio kikubwa na cha kipekee hapa duniani ambacho ni bwawa la maajabu la Mpanga Tazara lililopo kata ya Mpanga Tazara Halmashauri ya Mufindi ambalo linamaajabu ya kuwa na visiwa vinavyoelea juu ya maji na kuhama kutoka sehemu moja hadi nyingine  vikiwa na uoto wake wa asili

Mwenyekiti wa Halmashauri ya Wilaya Mufindi Mhe. Festo Mgina, ameridhia hoja hiyo baada ya  kuibuliwa na mjumbe wa baraza hilo Diwani wa kata ya Mdabulo Mhe. Ernei Nyeho, wakati akichangia hoja katika kikao cha baraza.

“Mheshimiwa Mwenyekiti, ni wakati sasa wa kuwa na mipango kabambe juu ya bwawa letu la Mpanga Tazara, tunatakiwa kutangaza majabu yaliyopo katika bwawa hili ili kuvutia watalii wengi na hatimaye kupata fedha kwa ajili ya Halmashauri hivyo kuchochea maendeleo” alisema Nyeho.

Kama ishara ya kukubaliana na Diwani huyo, Mwenyekiti wa Halmashauri Mhe. Festo Mgina, ameiagiza kamati ya fedha uongozi na mipango ishughulikie suala hilo na kuliweka katika Mpango mkakati wa Halmashauri pamoja na kuiagiza kamati ya uchumi, ujenzi na mazingira kuanzisha mchakato huo kwa mujibu wa kanuni.

Aidha, Mhe Mgina amesema mkakati  wa kwanza  uwe ni kuimarisha barabara ili kuwe na urahisi wa kufika eneo hilo la maajabu ambalo kwa sasa  linafikika kirahisi kwa kutumia usafiri wa treni.

Katika hatua nyingine Halmashauri ya Wilaya ya Mufindi imepokea Watendaji wa kata 11 kutoka sekretalieti ya ajira katika utumishi wa umma, watendaji hawa wanatarajiwa kutatua chanagamoto ya upungufu wa watumishi wa kada hiyo katika ngazi ya kata baada ya kuondolewa kwa kundi kubwa la Watumishi wakati wa Sakata   la kihistoria  la vyeti feki.

Sehemu Waajiriwa wapya 11  wa kada ya watendaji wa Kata wakitambulishwa mbele ya Baraza

Mhe. Nyeho Diwani wa Kata ya Mpanga Tazara, akijenga hoja ya kuweka Mpango Mkakati wa kulitangaza

Bwawa la Mpanga Tazara na maajabu yake

Kaimu Mkurugenzi Wakili Agape Fue, akizungumza wakati wa kikao cha Baraza