Bilioni 1.4 za World Vision Kunufaisha Maelfu ya Kaya Mufind

Posted on: December 6th, 2022

Bilioni 1.4  za World Vision Kunufaisha Maelfu ya Kaya Mufindi

05/12/2022

Waziri wa mifugo na uvuvi nchini Mhe, Mashimba Ndaki, leo amezindua mradi wenye thamani ya shilingi Bilioni 1.4 ambazo pamoja na mambo mengine zitatumika kununua na kuwapatia wananchi 1,200 wa kata za Nyololo na Maduma, mifugo ambayo ni ng’ombe jike wenyemimba 300, ngurue 600 pamoja na kuku 4,000 mradi ambao unanuia kupambana na utapiamlo kwa Watoto pamoja na kuwainua wananchi wa kata hizo kiuchumi chini ya ufadhili wenye tija kutoka shirika la World Vision. 

Akizungumza na wakazi Kata hizo mbili, katika uwanja wa Ofisi ya kata Nyololo, Mhe. Waziri Ndaki, ametoa wito kwa wanachi kuzingatia ufugaji bora ili kuepusha migogoro ya wakulima na wafugaji na kufuata ushauri unaotolewa na wataalamu sanjari na kuendelea kutoa ushirikiano kwa mfadhili World Vision katika kipindi chote cha utekelezaji wa mradi kwenye kata zao, ili lengo la kuondokana na tatizo la utapiamlo kwa Watoto pamoja na kuinua uchumi wa kaya litimie kadiri ya matarajio.

“Bajeti ijayo serikali itawajengea majosho mawili ambapo moja litajengwa kata ya Nyololo na lingine kata ya Maduma, lakini pia mwakani kwenye bajeti ijayo lazima tutajenga kituo kimoja cha kukusanya maziwa, mtaamua wenyewe, iwe hapa Nyololo au katikati ya Nyololo na Maduma, mahali ambapo wafugaji wote wanaweza kufika, mtachagua wenyewe, kwa hiyo tujenge kituo ili tuweze kuwasaidia muwe wafanyabiashara wafugaji”

Naye Mbunge wa jimbo la Mufindi kusini Mhe. David Kehenzile, ameliomba shirika la World Vision kupanua oneo la mradi ili  kuzifikia kata nyingine za ukanda wa joto na kubainisha kuwa ukanda huu wakazi wake wanachangamoto za kiuchumi ukilinganisha na ukanda wa baridi hivyo, kufikiwa na mradi huu kutachangia ukanda wote kuinuka kiuchumi

Kwa upande wake mkuu wa Wilaya ya Mufindi Mh .Saad Mtambule, amesema, watandelea kushirikiana na World Vision katika utekelezaji wa miradi yote wanayoitekeleza katika sekta za muhimu za Elimu, Afya, kilimo pamoja na mifugo.

Awali akisoma taarifa ya shirika Mkurugenzi mwandamizi World Vision Tanzani Dkt. Pasco Mayala, ameeleza kuwa, shabaha ya mradi ni kunufaisha watu wengi zaidi, kwani kila mnufaika aliyepata ng’ombe au ngurue kwa mujibu wa mkataba, atalazimika kumgawia mtu mwingine endapo ng’ombe atazaa ndama jike  lakini pia mnufaika wa nguruwe atampatia mtu mwingine vitoto viwili vya ngurue ambavyo ni dume na jike kwa uzao wa kwanza wa ngurue.