Balozi wa Norway Ahimiza Utunzaji Wa Mazingira Mufindi

Posted on: July 10th, 2019

Balozi wa Norway Ahimiza Utunzaji Wa Mazingira Mufindi

Balozi wa Norway nchini Bi. Elisabeth Jacobsen amewataka wananachi wa Vijiji vya Kipanga na Ihimbo vilivyopo Halmashauri ya Wilaya ya Mufindi kuendelea kutunza mazingira ili kulinda uhai wa watu na viumbe hai kote duniani

Mhe. Balozi Jacobsen, amatoa rai hiyo wakati wa ziara yake ya kukagua utekelezaji wa miradi ya utuzaji mazingira inayotekelezwa na wakazi wa Vijiji vya Kipanga na Ihimbo kwa ufadhili wa Serikali ya Norway.

Amesisitiza kuwa nchi yake imekuwa kinara wa kutunza na kuthamini mazingira na ndio sababu inaona umuhimu wa kusaidia harakati za utunzaji Mazingira Wilayani Mufindi ili wananchi wafanye shughuli za kujipatia kipato ambazo husaidia kuhifadhi Mazingira ikiwa ni pamoja na Upandaji miti ya Matunda, ufugaji Nyuki sanjari na kuhifadhi Misitu katika hifadhi ya Milima ya TAO la Mashariki inayowazunguka.

Tangu mwaka 2006 Serikali ya Norway  imekuwa ikifadhili ustawishaji wa Mazingira katika Halmashauri ya Mufindi kwa shabaha ya kulinda hifadhi ya Milima ya TAO la Mashariki iliyopo katika Vijiji vya Kipanga,  Ihimbo, Uhafiwa na Ukami ambapo wananchi huwezeshwa kujishughulisha na Upandaji Miti ya Matunda, Ufugaji Nyuki, kulinda mipaka ya hifadhi ya TAO la mashariki  hususani Hifadhi ya Misitu ya Uzungwa ambayo hupambwa na aina  mabalimbali za Wanyama pamoja na mimea.