Watumiaji wa mfumo wa NeST wapigwa msasa Mufindi DC

Posted on: March 11th, 2025

Watumiaji wa mfumo wa manunuzi kwa umma NeST Halmashauri ya Wilaya ya Mufindi wametakiwa kuzingatia utaratibu wa manunuzi ya mfumo huo katika kuendesha shughuli zote manunuzi ndani ya Halmashauri.

Kutumika kwa mfumo wa manunuzi ya umma NeST kunalenga udhibiti wa fedha katika utekelezaji wa miradi kuanzia kwenye mchakato wa kupata wazabuni hadi katika utekelezaji wa miradi mbalimbali.

Akizungumza katika semina ya kuwajengea uwezo watumiaji wa mfumo huo inayofanyika katika ukumbi wa CCM Wilaya        Afisa Ununuzi Mwandamizi kutoka Mamlaka ya Udhibiti wa Ununuzi kwa Umma Kanda ya Nyanda za Juu Kusini- Mbeya Ndg. Anthon Masau amesema mfumo wa NeST unaleta thamani halisi ya fedha katika miradi na kumuweka salama mtumiaji wa mfumo huo aliyefuata taratibu zote za kimfumo.

Masau ameongeza kuwa mtumiaji yeyote wa mfumo wa NeST katika manunuzi ya umma ambaye hatazingatia taratibu za mfumo huo anaweza kukabiliwa na adhabu ya kifungo jela au kutozwa faini au vyote kwa pamoja kwa mujibu wa sheria.

Awali wakati akifungua mafunzo hayo kwa niaba ya Mkurugenzi Mtendaji Halmashauri ya Wilaya ya Mufindi, Mkuu wa Idara ya Ugavi na Manunuzi Ndg. George Anthon amesema mafunzo hayo yatasaidia kuongeza uelewa na ufanisi kwa washiriki, hali itakayosaidia kuepukana na makosa ya manunuzi katika utekelezaji wa miradi.

Mafunzo hayo ya siku mbili yanawahusisha wakuu wa shule za sekondari, walimu wakuu wa shule za msingi, watendaji wa vijiji na kata pamoja na wahudumu wa afya ili waweze kuzingatia kanuni, taratibu na sheria  za manunuzi katika vituo vyao vya kazi.

NeST ni mfumo mpya wa kielektroniki wa manunuzi ya umma ambao umeanzishwa kwa lengo la kurahisisha na kuweka uwazi katika mchakato wa manunuzi Serikalini.