Wajasiriamali wadogo wadogo Mufindi wafundwa nidhamu ya matumizi ya fedha

Posted on: February 10th, 2025

Wajasiriamali wadogo wadogo wametakiwa kuwa na maamuzi sahihi katka sekta ya ujasiriamali maamuzi ambayo yatawasaidia kufanya biashara sahihi, kwani katika kutafuta mali kunahitaji ujasiri, maamuzi sahihi, matumizi sahihi ya fedha yaliyo katika mpango ili kuwasaidia kupata faida.

Rai hiyo imetolewa na Kaimu Mkurugenzi wa Halmashauri ya Wilaya ya Mufindi ambaye pia ni Mkuu wa Idara ya Elimu Sekondari Ndg. Daniel Mapilya wakati wa Hafla fupi ya ugawaji wa vitambulisho kwa wajasiriamali wadogo wadogo chini ya mpango wa kuwatambua, kuwasajili na kuwapatia vitambulisho wajasiriamali wadogo wadogo, ambapo amewataka kuwa makini katika matumizi ya kiwango cha fedha kinachoingia na kinachotoka, huku akisisitiza kiwango kinachotumika kuwa kidogo na kinachoingia kuwa kikubwa,sambamba na kutumia fedha ambazo ziko kwenye mpango wa matumizi badala ya kutumia fedha ambazo haziko kwenye mpango wa matumizi kwa kuacha matumizi yasiyo ya lazima na yanayozuilika.

Akitoa mafunzo ya matumizi ya fedha Meneja wa benki ya NMB Ndg. Focus Lubende amewashauri wajasiriamali hao kuongeza zaidi fursa za kujiajiri ambazo watarithisha vizazi vyao sambamba na kuwa na nidhamu ya matumizi ya fedha hususani katika kuweka malengo sahihi na kuyasimamia, kwani kwa kufanya hivyo watakuwa wameunga mkono juhudi za Serikali katika kuwajali wananchi ambapo kwasasa benki hiyo imepewa dhamana na Serikali ya kuwakopesha wajasiriamali wadogo wadogo wilayani Mufindi kiasi cha shilingi milioni 100 fedha zitakazowasaidia katika kukuza uchumi wao.

Kwa upande wake Mratibu wa Dawati la Wajasiliamali Wadogo Wadogo Halmashauri ya Wilaya ya Mufindi Ndg. Revocatus Mgaya amesema mpango wa kuwatambua na kuwasajili wajasiliamali wadogo umeanzishwa na Rais wa awamu ya sita Dkt. Samia Suluhu Hassan ukisimamiwa na Wizara ya Maendeleo ya Jamii, Jinsia, Wanawake na Makundi Maalum ukiwa na lengo la kuwatambua, kuwasajili na kuwapatia vitambulisho ili kuwasaidia katika upatikanaji wa fursa za kiuchumi ikiwemo upatikanaji wa mikopo kwa taasisi za kifedha, ambapo kwasasa halmashauri imezindua mpango huo kwa kata za Nyololo, Igowole, Ihowanza na  Malangali kwa wajasiliamali 65 kupatiwa vitambulisho kwa awamu ya kwanza, huku mchakato wa kuwatambua na kusajili wajasiliamali toka kata nyingine ukiendelea.