Wafugaji Mufindi Kunufaika na Dawa, za Kuogeshea na Kutibu Mifugo

Posted on: November 22nd, 2019

Wafugaji Mufindi Kunufaika na Dawa,  za  Kuogeshea na Kutibu Mifugo

Jamii za wafugaji kutoka kata 26 na Vijiji 40 vya Halmashauri ya Wilaya ya Mufindi, zitanufaika na dawa ya ruzuku maalum kwa  kuogesha na kutibu Mifugo ambayo hutumika kuua wadudu aina ya Kupe ili kupambana na Magojwa yanayosababishwa na wadudu hao.

 Dawa hiyo ijulikanayo kwa jina la PARANEX ikiwa na jumla ya ujazo wa lita 391 imetolewa na Serikali kuu kupitia Wizara ya Mifugo na Uvuvi ikiwa ni ruzuku kwa wafugaji  wa Halmashauri ya Wilaya ya Mufindi.

Kutolewa kwa dawa hizi kunatoa fursa ya kuogesha na kutibu Mifugo iliyopo kwa mujibu wa takwimu za Idara ya Mifugo na Uvumi ambayo ni Zaidi ya Ng’ombe 68,000, Mbuzi wasiopungua 14,000, Kondoo Zaidi ya 9,000 sanjari na Mbwa Zaidi ya 5,000.

Awali akizungumza na viongozi wa Wafugaji pamoja na Watendaji waliofika kupokea dawa hizo, mgeni wa heshima  ambaye ni Mkurugenzi Mtendaji wa Halmashauri Ndugu Netho Ndilito, amesema shabaha ya Serikali chini ya Rais Magufuli, ni kuhakikisha wananchi wa Mufindi wanakuwa na Afya bora na Mifugo yao inakuwa na Afya bora ili itakapoenda sokoni ilete fedha nzuri .

 “Hili linathibitishwa kwa kutupatia Fedha za kujenga Hospitali kubwa ya Halmashauri, Vituo vya Afya pamoja na kutoa kiasi cha shilingi milioni 6 za ukarabati wa Majosho manne ya awali katika vijiji vya Nyololo, Kitelewasi, Ugesa na Mkangwe na dawa hii sasa inaenda kutumika kuogesha na kutibu Mifugo kwenye Majosho Zaidi ya arobani yaliyopo” alisema Mkurugenzi Ndilito.

Baada ya kupokelewa kwa dawa za ruzuku, Serikali inatoa ruhusa  kwa wiki la kwanza la mwezi Disemba ambapo Mfugaji yeyote katika Halmashauri ya Mufindi ataogesha Mifugo yake bure na baada ya hapo Wafugaji wataogesha kwa kiasi cha shilingi 100 mpaka 200 kulinga na makubaliano ya wafugaji na Viongozi wao.