SERIKALI KUANZISHA WAKALA WA KUHUDUMIA BARABARA ZA VIJIJINI MAPEMA MWEZI WA 07

Posted on: May 16th, 2017

SERIKALI KUANZISHA WAKALA WA KUHUDUMIA BARABARA ZA VIJIJINI MAPEMA MWEZI WA 07

Picha kwa hisani ya Blog ya jamii.

ili kuimarisha miundombinu  muhimu ya Barabara za vijijini zinazohudumiwa na Halmashauri nchini, serikali inatarajia kuanzisha taasisi mpya ya wakala wa Barabara vijijini, ambao utakauwa  na jukumu la kufanya tathimini ya mtandao wa Barabara za mamlaka za serikali za mitaa sanjari na kusimamia  matengenezo yake kila mwaka kuanzia mwezi wa 07 mwaka huu.

Kauli hiyo imetolewa na waziri wa nchi Ofisi ya Rais Tamisemi Mh. George Simbachawene, wakati akiwasilisha makadilio ya bajeti ya Wizara yake kwa mwaka wa 2017 – 2018 kwenye kikao cha Bunge la bajeti kinachoendelea makao makuu ya nchi Mjini Dodoma.

Simbachawene amesema, katika kuhakikisha lengo hilo linafikiwa na kuleta tija kwa miundombinu hiyo muhimu kwa maendeleo ya nchi, Wizara  imeshirikisha wadau wote muhimu ambao wamepata fursa ya kutoa maoni yao, ambayo yamesaidia kuboresha muundo wa chombo hicho muhimu katika kuimarisha usimamizi wa barabara za mamlaka ya Serikali za mitaa.

“Mheshimiwa spika, ninapenda kulijuza Bunge hili kuwa chanzo cha Fedha za utekelezaji wa majukumu ya Wakala zitatokana na bajeti ya Mfuko wa Barabara na fedha kutoka kwa wadau wa maendeleo. Aidha utekelezaji wa mpango huu tunakusudia uanze mapema mwezi wa saba mara tu mwaka mpya wa fedha utakapoanza rasmi” 

Kuanzishwa kwa wakala wa Barabara za  mamlaka za serikali za mitaa, kutaiondoa rasmi Idara ya ujenzi  kwenye Halmashauri  nchini, iliyokuwa na jukumu la kusimamia ujenzi na matengenezo ya mara kwa mara ya Barabara zote zilizokuwa chini ya Halmashauri, jambo ambalo linategemewa kuongeza kasi ya kuboresha miundombinu ya Barabara katika kwa mamlaka ya Serikali za mitaa.