SERIKALI KUANZA UKARABATI MIUNDOMBINU YA BARABARA JIMBO LA MUFINDI KASKAZINI

Posted on: August 21st, 2024

Naibu Waziri wa Viwanda na Biashara ambaye pia ni mbunge wa jimbo la Mufindi Kaskazini Mh. Exaud Silaoneka Kigahe, ametoa pongezi kwa Rais wa Jamhuri ya Muungano wa Tanzania Dkt. Samia Suluhu Hassan kwa kutoa fedha kwa ajili ya ukarabati wa miundombinu ya barabara za jimbo la Mufindi Kaskazini.

Pongezi hizo amezitoa tarehe 20/08/2024 wakati wa mahojiano na redio Mufindi FM na kusema ukarabati huo utakuwa wa awamu mbili ambapo awamu ya kwanza ni kuanzia Barabara ya Mtili - Ifwagi yenye urefu wa kilometa 14 inayotarajiwa kugharimu jumla ya shilingi bilioni 23 ambayo inajengwa kwa kiwango cha lami.

Maboresho hayo yameanza kufuatia uharibifu wa miundombinu uliosababishwa na mvua kubwa za mara kwa mara na kusema kuwa awamu ya pili ya maboresho ya barabara itakua Mdabulo-Lulanda yenye urefu wa kilometa 16 na barabara ya Mafinga-Mgololo kufanyiwa maboresho ya mapitio ili kuwa na miundombinu inayoendana na mazingira.

Ameongeza kuwa ujenzi wa barabara hizo ni kwa ubora wa hali ya hewa na aina ya biashara za jimboni hapo, kwani fedha zaidi ya shilingi bilioni 100 zimetolewa kujenga miundombinu ya barabara na kuongeza huduma za mawasiliano, maji na umeme katika maeneo mbalimbali yenye upungufu kama Ikwea, Ihimbo na Ilondo.

Aidha Mh. Kigahe amewaasa wananchi wa jimbo la Mufindi Kaskazini kushiriki kikamilifu katika utunzaji na matumizi ya miundombinu hiyo kwa ajili ya kuleta maendeleo kwa wilaya na kwa mtu mmoja mmoja, huku akiwataka kuwa wavumilivu na kuiamini Serikali ya awamu ya sita ili kupata maendeleo zaidi.