Mufindi yazindua kampeni ya Uimarishaji klabu za Kupinga Rushwa kwa njia ya Upandaji miti

Posted on: January 27th, 2025

Mkuu wa Wilaya ya Mufindi Mh. Dkt. Linda Salekwa ameiongoza Halmashauri ya Wilaya ya Mufindi katika uzinduzi wa Kampeni ya Uimarishaji Klabu za kupinga rushwa kwa njia ya upandaji miti, zoezi lililoandaliwa na Taasisi ya Kupambana na Kuzuia Rushwa Mufindi na kufanyika katika Shule ya Sekondari Mufindi.

Akitoa Salam zake Mh. Salekwa Januari 27, 2025 amepongeza kazi nzuri ya upandaji miti iliyofanyika ndani ya Halmashauri kwa mwaka uliopita kwa kushirikisha taasisi mbalimbali ikiwemo TFS, Sao Hill pamoja na wananchi ikiwa ni sehemu ya kuunga mkono juhudi za Serikali katika sekta ya Misitu na Maliasili.

Dkt. Salekwa ametoa rai kwa wanafunzi wa shule ya sekondari Mufindi na wanafunzi wote kiujumla kufanyia kazi mafunzo yote waliyoyapata kwenye klabu za kupinga rushwa hususani rushwa ya ngono kama njia ya mkato ili  kufaulu masomo yao na badala yake njia sahihi ni kuongeza juhudi katika masomo yao ili kupata matokeo mazuri kwani Serikali pamoja na wazazi wanafanya kazi nzuri ya kuhakikisha wanafanya vizuri zaidi shuleni ikiwemo uwepo wa majengo mazuri, vyumba vya madarasa, maabara na Tehama.

Kwa upande wake Mkuu wa TAKUKURU Wilaya ya Mufindi Ndg. Abdull Abdarahman amesema wamekuwa na kampeni mbalimbali katika utoaji elimu ya kupambana na kuzuia rushwa katika shule za msingi, sekondari na vyuoni lengo ikiwa ni kujenga dhana ya uadilifu na uzalendo ili kuwa na nchi salama.

Kwa niaba ya Mkurugenzi Mtendaji Ndg. Mashaka Mfaume,  Afisa Maliasili Wilaya Ndg. Gilbert Ngailo amesema Halmashauri ya Wilaya ya Mufindi kwa msimu wa kilimo 2024/25 imeweka malengo ya kupanda jumla ya miti 25,000,000 kwa kushirikiana na taasisi mbalimbali,  makampuni pamoja na wananchi kwani sekta ya misitu ni nguzo maalum katika kukuza uchumi na kulinda vyanzo vya maji.