Mufindi yapongezwa kupata hati safi

Posted on: June 26th, 2024

Mkuu wa Mkoa wa Iringa Mhe Peter Serukamba  ameipongeza Halmashauri ya Wilaya ya Mufindi kwa kupata hati safi ya ukaguzi kutokana na taarifa ya Mdhibiti na Mkaguzi Mkuu wa Serikali kwa hesabu za serikali(CAG) inayoishia Juni 30,  2023.

Pongezi hizo zimetolewa wakati wa mkutano wa baraza hili maalum ambapo licha ya pongezi hizo Mh. Serukamba ameitaka Halmashauri ya Wilaya Mufindi kuhakikisha inaongeza nguvu  zaidi  katika usimamizi wa miradi ya Maendeleo ili  mradi hiyo iweze kukamilika kwa wakati.

Katika Taarifa hiyo ya Mdhibiti na Mkaguzi Mkuu wa Hesabu za Serikali kwa mwaka wa fedha 2022/2023 imebainisha uwepo miradi mbalimbali ambayo haijakamilika hivyo ameiagiza Halmashauri kuhakikisha  inapelekea fedha kwenye miradi hiyo ambayo bado haijakamilika ili  iweze kukamilika na kutoa huduma kwa wananchi ambapo pia amesisitiza kutoanza kwa miradi mpya kabla ya kumaliza miradi viporo ambayo hadi sasa bado haijakamilika.

Mkuu wa Mkoa wa Iringa Mh. Peter Serukamba

 Mkuu wa Wilaya ya Mufindi Mh. Dkt. Linda Salekwa

Katika hatua nyingine Mh. Serukamba amesisitiza   kufanyiwa kazi  haraka kwa maagizo na hoja ambazo zimebakia na majibu yake yawasilishwe katika ofisi ya Mdhibiti Mkaguzi Mkuu wa Hesabu za Serikali wa nje ili kuhakiki hoja hizo ili ziweze kufungwa huku akitoa agizo kwa Taasisi ya kudhibiti na kupambana na rushwa TAKUKURU kufuatilia wadaiwa wote wa mikopo ya 10%  ya wanawake, vijana na wenye ulemavu walipe madeni yao ili kutoa nafsi kwa wengine kupata mikopo kama yalivyo maelekezo ya Serikali.

Mwenyekiti wa Halmashauri Mh. Festo Mgina

Kwa upande wake Mwenyekiti wa Halmashauri Mh. Festo Mgina amesema wamepokea maelekezo yote ambayo yaliyotolewa na Mkaguzi na Mdhibiti wa Hesabu za Serikali sambamba na maelekzo na maagizo ya Mkuu wa Mkoa ambapo watayafanyia kazi ili kuepuka uwepo wa hoja ambazo zimesalia.

Mkurugenzi Mtendaji Ndg. Mashaka Mfaume

Akisoma taarifa hiyo  Mkurugenzi Mtendaji wa Halmashauri ya Wilaya ya Mufindi Ndg. Mashaka Mfaume ametoa shukrani kwa Mkuu wa Mkoa, Uongozi wa  Wilaya, Baraza la Madiwani pamoja na wataalam kwa ushirikiano mkubwa waliounyesha hali ambayo imepelekea halmashauri hiyo kupata hati safi kwa kuweza kushauriwa vema Baraza hilo.