Mufindi ya pongenzwa Ulinzi na Usalama wa Mtoto

Posted on: September 10th, 2017

Mufindi ya pongenzwa ulinzi na Usalama wa Mtoto

Na Ofisi ya Mkuu wa Mkoa, IRINGA

Wilaya ya Mufindi imepongezwa kuwa mstari wa mbele katika mapambano dhidi ya ulinzi na usalama wa mtoto ikiwa imeshinda mashauri 33 mahakamani.

Pongezi hizo zilitolewa na mkuu wa mkoa wa Iringa, Amina Masenza katika kikao maalum cha uhamasishaji wa shughuli za ulinzi na usalama wa mtoto Mkoa wa Iringa kilichofanyika katika ukumbi wa mikutano wa Ofisi ya Mkuu wa Mkoa jana.

Masenza alisema “kwa kipindi cha mwaka 2015/16 hadi 2016/17 katika mashauri yote tulioshinda mahakamani, mashauri 33 ni ya mahakama ya wilaya ya Mufindi na matukio 10 tu ndiyo ya mahakama ya wilaya ya Iringa ikiwa Halmashauri ya Manispaa mashauri 3 na Halmashuri ya wilaya ya Iringa mashauri 7. Hii kidogo inasikitisha kwani katika maeneo ya Halmashauri ya Manispaa ndipo matukio mengi huripotiwa”.

Alisema kuwa katika eneo la mjini ipo Ofisi ya Kamanda wa Polisi mkoa, Ofisi ya Hakimu Mkazi wa Mkoa na Ofisi ya Mwanasheria Mkuu wa Serikali ambao ndio wasimamizi wa mashauri haya huko mahakamani lakini mashauri 10 tu walishinda ikilinganishwa na wilaya ya Mufindi ambayo hutumia mwendesha mashataka wa Polisi kusimamia mashauri hayo mahakamani na kushinda mashauri 33. 

Mkuu wa Mkoa alielezea kwa masikitiko makubwa changamoto ya upelelezi wa mashauri ya watoto kuchelewa sana. Aliongeza kuwa mashauri ya watoto kuahirishwa mara kwa mara mahakamani na kutokuwa na siku maalum ya kusikiliza mashauri yanayowahusu Watoto ili kutoa fusra kwa mashahidi kuhudhuria kwa wakati ni changamoto nyingine inayokwamisha ufanisi katika kushughulikia mashauri ya watoto. 

=30=