Mgololo Sekondari Kunufaika na Ufadhili wa Ujenzi wa Maabara kutoka MPM

Posted on: February 15th, 2018

Mgololo Sekondari Kunufaika na Ufadhili wa  Ujenzi wa Maabara kutoka MPM

Shule ya Sekondari Mgogolo iliyopo Kata ya Makungu Halmashauri ya Wilaya ya Mufindi, inataraji kunufaika na mradi unaojumuisha  ujenzi Maabara za Masomo ya Sayansi sanjari na vyumba vitano vya (05) vya Madarasa unaofadhiliwa na Kiwanda cha kutengeneza Karatasi cha Mufindi Paper Mills MPM.

Kauli hiyo imetolewa na Mkurugenzi Mtendaji wa Halmashauri ya Wilaya ya Mufindi Profesa Riziki Shemdoe, alipokuwa akisoma taarifa ya mradi huo wakati wa tukio la kuweka jiwe la Msingi, tukio ambalo limetekelezwa na Makamu wa Rais Mhe. Samia Suluhu Hassan, akiwa katika ziara ya kikazi Wilayani   Mufindi.

Profesa Shemdoe, ametanabaisha kuwa, ujenzi wa jengo hilo la ghorofa moja  kwa ufadhili wa MPM unatarajiwa kuwa na Maabara tatu za  masomo ya Sayansi ambayo ni Kemia, Fiziki,  Bailojia pamoja na chumba kimoja cha kompyuta huku awamu ya pili ikihusisha ujenzi wa Madarasa matano (05) kwa ajili tahasusi za kidato cha Tano na Sita  zinazotarajiwa kuanzishwa.

Mkurugenzi huyo ameendelea kubainisha kuwa awamu ya kwanza ya Mradi inayojumuisha vyumba vitatu vya Maabara na chumba kimoja cha Kopyuta, inatarajiwa kukamilika mwezi wa nne mwaka huu, huku gharama ya Mradi mzima ukigharimu zaidi ya shilingi Milioni 400 chini ya ufadhili wa Kiwanda cha Karatasi Mufindi MPM.

Naye Makamu wa Rais Mhe. Samia Suluhu Hassani, ameutaka Uongozi wa Shule hiyo na Halmashauri kwa ujumla, kuhakikisha mradi huo  unatunzwa ili uendelee kuwa bora kwa kipindi cha miaka mingi ijayo pamoja na kumshukuru Mwekezaji kwa kujitoa na kuamua kuisaidia jamii.