MKUU WA WILAYA: NI AIBU MIAKA 55 YA UHAURU BADO BAADHI YA WATANZANIA WANAJISAIDIA PORINI

Posted on: August 16th, 2017

MKUU WA WILAYA MUFINDI: NI AIBU MIAKA 55 YA UHURU BADO KUNAWATANZANIA WANAJISAIDIA PORINI

                                                                                              16/08/2017

Serikali Wilayani Mufindi, imesema itaanza kuchukua hatua kali za kisheria zilizopo kwa wakazi wa Halmashauri ya Wilaya ya Mufindi, wasiozingatia sheria za afya ya mazingira, hususani suala la kuwa na vyoo bora ikizingatiwa kuwa elimu juu ya umuhimu wa kutumia choo bora imetolewa vya kutosha kwa wakazi wa Halmashauri hiyo.

Taarifa ya kitengo cha habari na Mawasiliano cha Halmashauri ya Wilaya ya Mufindi, imetanabaisha kuwa, kauli hiyo imetolewa na Mkuu wa Wilaya ya Mufindi Mh Jamhuri William, katika kata ya Mbalamaziwa alipokuwa akizindua mradi wa Maji, Afya, Lishe, usafi wa Mazingira sanjari na usafi wa Mtoto chini ya miaka 05 ukitekelezwa kwa pamoja kati ya Halmashauri hiyo kwa kushirikiana na shirika la (peoples Development Forum) PDF chini ya ufadhili wa UNICEF.

Mh. Jamhuri amesema ni aibu kwa muda wa miaka 55 ya uhuru bado kuna Watanzania wanajisaidia porini au kwenye vyoo visivyo na sifa na kuwa chanzo cha uchafuzi wa mazingira pamoja na magonjwa ya mlipuko na kufafanua kuwa suala la kuwa na nyumba bora linalozingatiwa na wakazi wa Halmashauri hiyo, ni lazima liende sambamba na ujenzi wa choo chenye ubora huku akiahidi kuchukua hatua za kinidhamu kwa watendaji wa Vijiji watakao zembea kusimamia suala hilo.

Katika hatua nyingine Mh. Jamhuri William, amewataka wakazi wa Halmashauri hiyo, kutumia vema uwepo wa aina mbalimbali za vyakula  Wilayani humo, kuondokana na suala la lishe duni licha ya Mkoa wa Iringa kuwa miongoni mwa mikoa 05 ya nyanda za juu inayoongoza kwa uzalishaji wa mazao ya chakula, huku akitilia mkazo kuachana na tabia ya kula unga wa Sembe badala ya dona yenye viinilishe hitajika.

BDF Kwa kushirikiana na Halamashauri ya Wilaya ya Mufindi chini ya ufadhli wa UNICEF, itatekeleza miradi hiyo katika kata nne za Mbalamaziwa, Ikweha, Sadani na Mtambula, ambapo itachimba visima, kukarabati miradi ya Maji, Ujenzi wa vyoo kwenye tasisi za umma pamoja na Usafi na lishe bora kwa Mtoto chini ya miaka 05