MIRADI ITELEKELEZWE KWA KUZINGATIA MIONGOZO NA UWAZI - DED MUFINDI

Posted on: July 2nd, 2024

Watumishi wa Umma kwenye sekta mbalimbali wametakiwa kuwa wazalendo hususani katika suala zima la usimamizi wa miradi ya maendeleo katika maeneo yao ya kazi kwani miradi hiyo inatokana na fedha za Serikali pamoja na nguvu za wananchi.

Rai hiyo imetolewa Julai mosi na Mkurugenzi Mtendaji wa Halmashauri ya Wilaya Mufindi Ndg. Mashaka Mfaume katika ziara yake ya ukaguzi wa miradi ya maendeleo ambapo ametaka miradi yote inayofanyika kusimamiwa vyema kwa kuzingatia taratibu zote zinazoelekezwa na Serikali ikiwemo uundwaji wa kamati za manunuzi, mapokezi na ujenzi.

Mfaume amesema kuwa ili miradi iweze kuwa katika ubora na ufanisi lazima kila kamati ifanye majukumu yake kwa kuzingatia uwazi, ukweli, utunzaji wa nyaraka, kuzingatia muda wa utekelezaji mradi, ushirikishwaji wa viongozi wa eneo husika pamoja na wananchi ili kutengeneza mazingira ya kuuenzi na kuutunza mradi kwa kizazi cha sasa na vijavyo.

Katika ziara yake hiyo Mfaume aliambatana na wakuu wa idara za Elimu, Manunuzi, Afya, Mipango pamoja na Ujenzi lengo ikiwa ni kuendelea kutoa elimu na msisitizo kwa wasimamizi wa miradi inayoendelea katika maeneo mbalimbali katika Halmashauri ya Wilaya ya Mufindi kwa sekta mbalimbali ikiwemo sekta ya afya na elimu ambapo maeneo yaliyotembelewa ni Nyololo, Mbalamaziwa, Mgololo, Iramba na Mpanga Tazara.