Milioni 758 kutekeleza miradi ya usafi na mazingira katika sekta ya afya na elimu

Posted on: March 1st, 2025

Wasimamizi wa miradi ndani ya Halmashauri wametakiwa kuzingatia taratibu zote za usimamizi na utekelezaji wa miradi ikiwemo matumizi ya mfumo wa manunuzi(Nest), ubora wa miradi kulingana na thamani ya fedha pamoja na ukamilishaji wa miradi kwa wakati.

Rai hiyo imetolewa na Mkurugenzi Mtendaji Ndg. Mashaka Mfaume wakati wa kikao kazi kilichojumuisha timu ya menejimenti, Takukuru pamoja na wataalam kwa ngazi ya kata toka sekta ya utumishi, afya na elimu ambao wanatekeleza miradi katika maeneo yao, lengo ikiwa ni kuwakumbusha kuzingatia taratibu zote za utekelezaji wa miradi ya maendeleo.

Katika utekelezaji wa miradi hiyo Halmashauri ya Wilaya ya Mufindi imepokea kiasi cha shilingi milioni 758 kwa ajili ya utekelezaji wa miradi katika sekta ya afya na elimu, ambapo miradi inayotarajiwa kutekelezwa ni ukarabati wa miundombinu ya matundu ya vyoo yatakayogharimu shilingi milioni 496,799,5889.34, ujenzi wa miundombinu ya usafi wa mazingira katika zahanati na ujenzi wa kichomea taka hospitali ya Wilaya kwa gharama ya shilingi milioni 142,200,000, ukarabati wa madarasa, ukarabati wa nyumba ya walimu , ukamilishaji wa daharia na kusaidia ujenzi wa daharia kwa gharama ya shilingi milioni 120,000,000.

Kwa upande wake Afisa Uchunguzi TAKUKURU Wilaya ya Mufindi Ndg. Raymond Ngatunga amesisitiza kuzingatiwa na kufuatwa kwa taratibu zote za mfumo wa manunuzi katika utekelezaji wa miradi, lakini pia kuzingatia uwepo wa nyaraka zote muhimu wakati wa utekelezaji wa mradi ikiwemo kuzingatia sharia zote katika utekelzaji wa miradi, kuepuka matumizi ya nyaraka vivuli katika maeneo yasiyotakiwa ili kuepuka hoja zinazoepukika, pia amesisitiza kila mmoja kutimiza wajibu wake na kuepuka tamaa kwenye fedha za Serikali.

Kikao kazi hicho kimeshirikisha timu ya Menejimenti, Watendaji wa kata wenye miradi, maafisa elimu kata zenye miradi, watendaji wa vijiji vyenye miradi, walimu wakuu, wakuu wa shule , wahasibu wa shule na wakuu wa zahanati zenye miradi.