MILIONI 583 KUJENGA SHULE MPYA YA SEKONDARI KIBENGU-USOKAMI

Posted on: September 9th, 2024

Mkuu wa Mkoa wa Iringa Mhe. Peter Serukamba ameishukuru Serikali ya awamu ya sita inayoingozwa na Rais Dkt. Samia Suluhu Hassan kwa kutoa fedha nyingi kwaajili ya ukarabati na ujenzi wa shule za msingi na sekondari jambo ambalo linaenda kuondoa adha ya wanafunzi kutembea umbali mrefu kupata elimu.

Shukrani hizo amezitoa Septemba 9, 2024 wakati wa ziara ya ukaguzi wa mradi aliyoifanya katika Halmashauri ya Wilaya ya Mufindi ambapo ametembelea mradi wa ujenzi wa shule Mpya ya Sekondari ya Kibengu ambayo ujenzi wake unatarajiwa kugharimu kiasi cha shilingi Millioni 583, ambapo akiwa eneo la mradi Mhe. Serukamba ameridhishwa na hali ya ujenzi ulipofikia huku akiagiza kuendelea kuongeza kasi ili majengo ya shule hiyo yaweze kukamilika kwa wakati.

Nao baadhi ya Wananchi wametoa shukrani nyingi kwa Serikali kwa kuwajengea shule na kuboresha miundombinu ya shule kwa kusema kuwa miradi hiyo ikamilike kwa wakati ili wanafunzi waondokane na adha ya kutembea umbali mrefu kupata elimu

Sambamba na hayo Mhe. Serukamba ameipongeza Halmashauri hiyo kwa kuwahi kutekeleza ujenzi wa miradi hiyo kwani kwasasa hali ya hewa ni nzuri hivyo ni vema ikakamilika kabla ya msimu wa mvua kuanza.