Milioni 300 za Halmashauri, zaboresha maisha ya Vijana na Wanawake Mufindi

Posted on: July 9th, 2017

MILIONI 300 ZA HALMASHAURI, ZABORESHA MAISHA YA VIJANA NA WANAWAKE MUFINDI

Halmashauri ya Wilaya ya Mufindi, imetoa mikopo yenye dhamani ya Shilingi Milioni 300 kwa vikundi (147) vya wanawake na Vijana, kwa kipindi cha mwaka wa fedha 2016-2017 ikiwa ni kutekeleza sheria ya kuchangia maendeleo ya Vijana na Wanawake wa Halmashauri hiyo.

Takwimu hiyo imetolewa na Mkuu wa Idara ya Maendeleo ya Jamii wa Halmashauri Wilaya ya Mufindi Bw. Hatibu Bwashehe, wakati wa hafla maalum ya kukabidhi hundi 63 zenye dhamani ya sh. Milioni 150 kwa kipindi cha robo ya nne na ya mwisho ya Mwaka wa fedha 2016 – 2017 uliokamilika  juni 30 mwaka huu.

Bwashehe, ametanabaisha kuwa, kati ya fedha hizo, milioni 150 zilitolewa kwa awamu ya kwanza mwezi novemba mwaka jana kwa vikundi (44) vya wanawake na kunufaisha  jumla ya watu (691) wakati vikundi vya Vijana vilikuwa 40  na vikanufaisha vijana wapatao (656) ambapo vijana wa jinsi ya kiume walikuwa (389) na jinsi ya kike (267) .

Akizungumza kabla ya kukabidhi hundi hizo kwa viongozi wa vikundi, Mwenyekiti wa Halmashauri Mh. Festo Mgina, amewataka wanufaika wa mikopo hiyo kuitumia kadri ya maandiko yaliyo wapa sifa ya kupewa mikopo na akasisitiza wahakikishe vikundi hivyo vinakua endelevu.

Naye Mkurugenzi mtendaji wa Halmashauri ya Wilaya ya Mufindi Profesa Riziki Shemdoe, amewataka wanufaika wa mikopo hiyo kuzingati marejesho ya fedha hizo ili kutoa fursa kwa vikundi vingine kunufaika na mikopo hiyo huku akisisitiza kuwa fedha hizo ni mikopo na si ruzuku.