Mikopo Ya Milioni 352 Umetolewa Kwa Wanawake, Vijana na Walemavu Mufindi

Posted on: July 2nd, 2020

Mkopo wa Millioni 352,250,000.00 Umetolewa Kwa Wanawake, Vijana na Watu Wenyeulemavu Mufindi

“Mkopo mlioupata leo, ukatumike kwenye malengo husika hasa katika kuwakomboa kiuchumi, kwa kufanya hivyo mtaweza kurejesha na kutimiza malengo ya Serikali ya kuinua wanawake, Vijana na watu wenye ulemavu kutoka katika umaskini”

Kauli hiyo imetolewa na Katibu Tawala wa Wilaya ya Mufindi Ndugu Servi Ndumbalo, alipokuwa akimuwakilisha Mkuu wa Wilaya ya Mufindi Mheshimiwa Jamuhuri William, katika hafla fupi ya utoaji wa mikopo kwa vikundi 113 vya wanawake, vijana na watu wenye ulemavu iliyofanyika katika ukumbi wa Halmashauri ya Wilaya ya Mufindi.

Amesema, Halmashauri ya Wilaya ya Mufindi imetimiza malengo iliyojiwekea kwa kutoa mikopo asilimia miamoja, (100%) ikiwa ni malengo waliyojiwekea ya kutoa mkopo kiasi cha shilingi milioni 602,760,963.48/= kwa mwaka wa fedha 2019/2020 kutoka katika mapato yake ya ndani. Hivyo ameupongeza uongozi wa Halmashauri, wataalamu kwa kufikia malengo waliyojiwekea.

Akitoa taarifa ya mikopo, Mkuu wa idara ya Maendeleo ya Jamii Ndugu, Robert Sungura, amesema kuwa Kwa mwaka wa fedha 2019/2020, Halmashauri ya Wilaya ya Mufindi imetoa mikopo yenye thamani ya Sh.602,760,963.48/=  kwa vikundi vya Wanawake, Vijana na Watu wenye ulemavu.  

”Ndugu mgeni rasm, Fedha hizi za mkopo zilitolewa katika awamu mbili ambapo awamu ya kwanza ilitolewa kiasi cha Sh. 240,782,000.00 mwezi Januari, 2020 kwa mchanganuo ufuatao; Sh. 233,251,000/=zilitolewa kwa vikundi 78 vya wanawake vyenye jumla ya wanufaika 948, kiasi cha Sh. 91,031,000.00 zilitolewa kwa vikundi 29 vya vijana  vyenye wanufaika 212 (me 129 na  ke, 83) na kiasi cha sh. 7,500,000/= zilitolewa kwa vikundi 3 vya watu wenye ulemavu vyenye jumla ya wanufaika 28” alibainisha Mkuu huyo wa Idara.

Aidha, aliendelea kutanabaisha kuwa, Katika awamu ya pili, Juni 2020; kiasi cha sh. 352,250,000.00 kimetolewa kwa kuviwezesha vikundi vya wanawake vijana na watu wenye ulemavu ambapo kiasi cha sh. 164,850,000/= kimetolewa kwa vikundi 56 vya wanawake vyenye jumla ya wanufaika 532, kiasi cha sh. 164,100,000/= kimetolewa kwa vikundi 50 vya vijana vyenye jumla ya wanufaika 337 (me, 172na Ke 165) na kiasi cha sh. 23,300,000/=kwa vikundi 7 vya wanufaika 43 wenye ulemavu (me, 23 na Ke 20).

Hafla za Utoaji mkopo imefanyika katika ukumbi wa Halmashauri (Bomani) zimehudhuriwa pia na Kaimu Mkurugenzi wa Halmashauri ya wilaya ya Mufindi Ndugu Jeswadi Ubisimbali, wataalam mbalimbali na wananchi wa Wilaya ya Mufindi.