MAAFISA WAANDIKISHAJI WASAIDIZI NGAZI YA KATA WAPATA MAFUNZO UBORESHAJI DAFTRAI LA WAPIGA KURA

Posted on: December 19th, 2024

Maafisa Waandikishaji Wasaidizi ngazi ya kata katika Halmashauri ya Wilaya ya Mufindi wametakiwa kufahamu vema majukumu yao na kuyafanyia kazi kwa ufasaha kwani mafunzo hayo ndio nyenzo ya kufanyia kazi katika maeneo yao wakati wa zoezi zima la Uboreshaji wa Daftari la Kudumu la Wapiga Kura.

Rai hiyo imetolewa na Mjumbe wa Tume Huru ya Uchaguzi Mh. Jaji Asina Omari wakati wa mafunzo ya siku mbili kwa Maafisa Waandikishaji Wasaidizi ngazi ya kata, ambapo amewataka kufahamu vema kwa nadharia na vitendo matumizi ya vifaa vyote vitakavyotumika, sambamba na majukumu yote yatakayofanyika wakati wa zoezi jambo litakalosaidia katika utatuzi wa changamoto zinazoweza kujitokeza.

Aidha amewataka kuhakikisha vifaa vyote vitakavyotumika vinahifadhiwa na kutumika katika mazingira mazuri na salama, lakini pia kuhakikisha wanawahudumia wananchi ipasavyo kwa ushirikiano mkubwa baina ya waandikishaji wasaidizi ngazi ya kata, waandishi wasaidizi pamoja na waendesha vifaa vya bayometriki, pia kuhamasisha na kutoa elimu kwa wananchi ili waweze kushiriki kikamilifu.

Kwa upande wake Afisa Mwandikishaji Wilaya Ndg. Gilbert Ngailo amesema mafunzo hayo yanahusisha namna bora ya ujazaji wa fomu, matumizi ya mfumo wa kuandikisha wapiga kura pamoja na matumizi sahihi ya vifaa vya uandikishaji wa wapiga kura.

Ngailo amesema kuwa zoezi la uboreshaji daftari la kudumu la wapiga kura kwa Halmashauri ya Wilaya ya Mufindi yenye majimbo mawili litaanza Desemba 27, 2024 na kukamilika Januari 02, 2025, ambapo pia litahusisha mawakala  wa vyama vya siasa watakaokuwepo katika vituo vya kujiandikishia wapiga kura, lengo ikiwa ni kujenga mazingira ya uwazi.