Maafisa Ugani Wapewa Vifaa vya Kilimo

Posted on: September 7th, 2023

MAAFISA UGANI WAPEWA VIFAA VYA KILIMO.

Serikali ya Halmashauri ya Wilaya ya Mufindi imewataka Maafisa kilimo wa kata kutumia vyema vifaa vilivyotolewa na serikali ili kuwasaidia wakulima Wilayani hapa.

Hayo yamesemwa Jumatano tarehe 06/09/2023 na katibu Tawala wa Halmashauri ya Wilaya ya Mufindi ndg. Frank Sichalwe, wakati akikabidhi vifaa vya kilimo kwa Maafisa ugani na kuwataka watumishi hao kutoa huduma hiyo pasipo kumtoza chochote mkulima.

“Vitendea kazi mtakavyo vipata hapa mkavitendee haki sawasawa na matumizi yake msigeuze matumizi, nimeambiwa kwamba hiki chombo cha kupimia udongo ni bure, mwananchi apimiwe udongo bure sasa kisigeuke kuwa sehemu ya biashara kwamba ili sisi tukupimie udongo tunahitaji kiasi kadhaa, huduma inatolewa kwa wananchi wote na wajulishwe kipimo cha kupimia udongo kimefika, kupima ni bure na kuchukua matokeo ni bure hakuna malipo yeyote, kama wananchi wako mbali kibebeni muwafate mkapime hukohuko”. Amesema Sichwale

Naye Afisa kilimo wa Halmashuri ya Wilaya ya Mufindi ndg Damasi Lubuva ameishukuru serikali kwa kuwapa vifaa na ameahidi kuwatumikia vyema wakulima

“ Tunatoa shukrani zetu za dhati kwa mgeni rasmi ambae alikuwa Katibu Tawala wa Halmashauri ya Mufindi kwa kuweza kugawa vitendea kazi hivi kwa maafisa ugani ambao nao wameahidi kuongeza bidi na ufanisi ili kuleta tija kwa wakulima na sekta kiujumla”. Amesema Lubuva