KAMATI YA KUDUMU YA BUNGE YARIDHIKA NA KIWANGO CHA UJENZI KITUO CHA AFYA MNINGA

Posted on: September 9th, 2024

Kamati ya Kudumu Bunge TAMISEMI yaridhishwa kiwango cha ujenzi kituo cha Afya Mninga.

Ikiwa katika ziara zake za ukaguzi wa miradi ya maendeleo hapa nchini, Kamati ya Kudumu ya Bunge Tawala za Mikoa na Serikali za Mitaa imeridhishwa na ujenzi wa kituo cha Afya Mninga na kuutambua mradi huo kama mradi bora ambao ujenzi wake unaendelea kuwa ni wa kiwango cha kuridhisha na mfano wa kuigwa.

Mwenyekiti wa kamati hiyo Mhe. Justine Nyamoga pamoja na kamati yake wamepongeza ujenzi na kusema kuwa matokeo ya ujenzi huo wa kuridhisha yametokana na usimamizi mzuri jambo linaloonyesha uwepo wa utendaji kazi wa pamoja ili kupata mradi ulio bora na unaozingatia viwango sahihi.

Aidha kamati hiyo imepongeza Uongozi wa Wilaya na Halmashauri kwa ushirikiano mzuri waliouonyesha katika usimamizi wa miradi huku ikitoa rai kwa uongozi kuwatazama kwa jicho la tatu watumishi wote wanaosimamia miradi katika ubora unaoridhisha ili iwe mfano kwa wengine.

Kwa upande wake Mwenyekiti wa Halmashauri Mhe. Festo Mgina kwa kushirikiana na Mkurugenzi Mtendaji Ndg. Mashaka Mfaume wameishukuru Serikali ya awamu ya sita kwa fedha wanazotoa kwenye miradi huku wakiiomba TAMISEMI na Kamati hiyo kuitazama Halmashauri kwa jicho la tatu katika suala zima la watumishi hususani katika sekta ya afya kwa mustakabali wa afya za wananchi kwani waliopo ni wachache na mahitaji ni makubwa.