JAPANI YAFADHILI UJENZI WA BWENI SEKONDARI YA ITONA WILAYANI MUFINDI

Posted on: March 9th, 2022

Halmashauri ya Wilaya ya Mufindi,imetiliana saini na Serikali ya Japan kupitia ubalozi wa nchi hiyo hapa nchini kufadhili ujenzi wa bweni la wasichana katika Shule ya Sekondari Itona iliyopo kata ya Ifwagi Wilayani Mufindi.

Ujenzi wa bweni la wasichana unatarajiwa kuwa wa mwaka mmoja kuanzia mwezi wa tatu mwaka huu, kwa gharama ya Dola 101,363 sawa na shilingi Milioni 231.48 bweni hilo linalotarajiwa kujengwa litakuwa na uwezo wa kuchukua jumla ya wanafunzi 80 kwa wakati mmoja.

Hafla hiyo imefanyika katika ofisi za Ubalozi wa Japan zilizopo jijini Dar es salam na Mkurugenzi wa Halmashauri ya Wilaya ya Mufindi Bi, Zaina Mlawa na Balozi wa Japan Nchini Tanzania Goto Shinichi.

Wengine walioshuhudia utiaji saini huo ni pamoja na Mkuu wa Wilaya ya Mufindi Mheshimiwa Saad Mtambule, Mwenyekiti wa Halmashauri Mheshimiwa Festo Mgina, A fisa Elimu Sekondari, mwanasheria wa Halmashauri, Mhandisi wa Ujenzi, Mkuu wa Shule ya Itona na Maafisa mbalimbali wa Ubalozi huo.

Akizungumza Mkuu wa Wilaya Mheshimiwa Saad Mtambule kwaniaba ya Uongozi wa Halmashauri ya Mufindi ameshukuru Uongozi wa Ubalozi wa Japan kwa kuweza kushirikiana na Wilaya ya Mufindi katika kufadhili ujenzi wa bweni hilo ambao utatatua changamoto ya wanafunzi kutembea umbali mrefu kufuata elimu.

Na Sima Bingileki

Afisa Habari