IRINGA USAFI JADI YETU

Posted on: August 29th, 2024

Mkuu wa wilaya ya Mufindi Mh. Dkt Linda Salekwa amewataka wananchi wa kata za Ifwagi na Igowole kuendelea kuimarisha usafi wa mazingira katika maeneo yao ili kuepukana na magonjwa yanayosababishwa na uchafu.

Mh. Dkt Salekwa ameyasema hayo wakati akizungumza na wananchi katika kampeni ya Mtu ni Afya iliyofanyika katika kata hizo na kuhudhuriwa na mamia ya wananchi na viongozi mbalimbali kuanzia ngazi ya mkoa hadi vijiji.

Kampeni hiyo inayoongozwa na balozi wake ambaye pia ni msanii wa muziki wa asili Mrisho Mpoto (Mjomba) imefanyika kwa siku mbili katika kata hizo huku wananchi walioonesha ufahamu mkubwa katika usafi wa aina mbalimbali wakitunukiwa zawadi kama pongezi ili kuwahamasisha kuendeza usafi kwenye maeneo yao.

Hamasa ya kampeni ya Mtu ni Afya imeambatana na utoaji wa elimu ya usafi wa mazingira na  michezo mbalimbali ikiwemo mchezo wa rede, kuvuta kamba, kuruka kamba, na danadana ikiwa kama ni sehemu ya kuwakumbusha wananchi kufanya mazoezi ili kuimarisha afya zao.

Kampeni ya Mtu ni Afya ilizinduliwa tarehe 09/05/2024 na makamu wa Rais Dkt Filip Mpango ikiwa na kauli mbiu ya Fanya kweli Usibaki nyuma ambapo tangu kuzindiliwa kwake mkoa wa Iringa umekuwa kinara wa usafi kwa asilimia 95%.