HALMASHAURI ZITUMIE MAPATO YA NDANI KUFANYA MIRADI INAYOONEKANA-MAJALIWA

Posted on: July 7th, 2024

Halmashauri mbalimbali hapa nchini zimetakiwa kutumia mapato ya ndani kwa ajili ya kufanya miradi ya maendeleo inayoonekana badala ya kukaa na kusubiri kupata fedha za miradi kutoka Serikali Kuu.

Rai hiyo imetolewa Julai 7, 2024 na Waziri Mkuu Mhe. Kassim Majaliwa wakati wa ziara yake mkoani Iringa katika Halmashauri ya Wilaya ya Mufindi alipokuwa akiweka jiwe la msingi katika shule ya Sekondari ya wasichana Iramba katika kata ya Itandula Wilaya ya Mufindi ambapo amesema kuwa moja ya madhaifu ya halmashauri nyingi hapa nchini ni kutotenga fedha za mapato ya ndani kujenga miradi inayoonekana.

Majaliwa baada ya ukaguzi wa shule hiyo amepongeza uamuzi wa baraza la madiwani na timu ya menejimenti kwa uamuzi sahihi katika kuunga mkono juhudi za Serikali katika sekta ya elimu kwa kutenga fedha kwa ajili ya ujenzi wa shule hiyo ili mtoto wa kike aweze kutimiza ndoto zake huku akiitaka Halmashauri ya Mufindi kuendelea kutenga fedha za kutosha kukamilisha mradi huo kwa wakati ili wanafunzi waweze kutumia shule hiyo mapema 2025.

Akitoa taarifa ya mradi  huo Mkuu wa Divisheni ya Elimu Sekondari Mwl. Daniel Mapilya amesema kuwa mradi huo unatarajiwa kugharimu kiasiccha shilingi bilioni 1.78 ukijumuisha vyumba vya madarasa nane, ofisi nne, jengo la utawala moja, maabara tatu, chumba cha Tehama kimoja, nyumba za walimu tano(2 in 1)zitakazochukua walimu 10, bwalo moja na mabweni manne pamoja na vyoo kwa ajili ya wanafunzi wa shule hiyo.