Wilaya ya Mufindi Yazindua Muongozo wa Kuimarisha Sekta ya Elimu Nchin

Posted on: September 29th, 2022

Wilaya ya Mufindi Yazindua Muongozo wa Kuimarisha Sekta ya Elimu Nchini

Serikali Wilayani Mufindi imezindua rasmi miongozo mitatu ya Elimu Msingi na Sekondari iliyoandaliwa na Ofisi ya Rais TAMISEMI yenye shabaha ya kuboresha sekta muhimu ya Elimu hapa chini ikiwa ni takribani mwezi mmoja umepita baada ya Waziri Mkuu wa Jamhuri ya Muungano wa Tanzania Mhe. Kassim Majaliwa, kuzindua miongozo hiyo kitaifa.

Miongozo hiyo inayotarajiwa kuleta matokeo chanya ni pamoja na Muongozo wa uteuzi wa ngazi mbalimbali za viongozi kwa Mamlaka za   Serikali za Mitaa na Tawala za Mikoa, Muongozo unaobainisha mikakati ya  ufundishaji na ujifunzaji kwa ngazi za Elimu Msingi na Sekondari, wakati muongozo wa tatu, ukiangazia kutafuta suluhu ya changamoto katika uboreshaji Elimumsingi na Sekondari.

Awali mgeni wa heshima katika hafla ya uzinduzi, Mkuu wa Wilaya ya Mufindi Mhe. Saad Mtambule, amesema, jambo la kwanza na la muhimu katika kuboresha Elimu ni Walimu na Wanafunzi kuimarisha nidham, kutimiza wajibu kwa kutengeneza mipango binafsi katika Ufundishaji.

“Sasa tukitaka tuboreshe Elimu na kuyatafuta maarifa vizuri, jambo la kwanza ni nidham, nidham ya kwanza ianze na Mwalimu, kwa hiyo, nitoe wito kwa Maafisa Elimu Kata, Wakuu wa shule na Walimu wakuu pamoja na wadau wote tuwe na nidham, angalia nguo unazovaa, lugha unayoongea, unajali muda kiasi gani, unafuatilia maendeleo ya Wanafunzi kiasigani” 

Aidha Mh, Mtambule amewapongeza walimu kwa kazi kubwa wanayoifanya na kubainisha kuwa Wilaya ya Mufindi imeweka mpango wa kujenga shule maalum ya Sekondari ya Wilaya, ambayo itadahili wanafunzi waliopata alama za juu zaidi katika mtihani wa darasa la saba.

Kwa upande wa Mafisa Elimu Kata, Wakuu wa Shule  Walimu wakuu pamoja na wadau wa Elimu, waliohudhuria Hafla hiyo, wamepongeza uzinduzi huo kwani utakuza maendeleo ya Elimu Wilayani hapa kwa kuwaongezea ujuzi katika kazi hiyo