DC Mufindi Aagiza Kusitishwa Kwa Huduma ya Maji Kata ya Mbalamaziwa

Posted on: April 5th, 2019

       DC Mufindi Aagiza Kusitishwa Kwa Huduma ya Maji Kata ya Mbalamaziwa

Mkuu wa Wilaya ya Mufindi Mhe. Jamhuri William, ameagiza kusitishwa kwa huduma ya Maji kwa wananchi zaidi ya 70 wa Kata ya Mbalamaziwa, waliojiunganishia Maji pasipo kufuata taratibu.

Kiongozi huyo Mkuu katika ngazi ya Wilaya ametoa agizo hilo katika Kijiji cha Nyanyembe kilichopo kata ya Mbalamaziwa wakati wa ziara ya kukagua utekelezaji wa kampeni ya kitaifa ya usafi wa Mazingira katika Halmashauri ya Wilaya ya Mufindi.

“Wale wote walijiunganishia Maji kinyume cha utaratibu, natoa agizo, kuanzia leo Maji hayo yakatwe mara moja, lakini vilevile ipigwe hesabu tangu walipojiunganishia ili tujue wametumi Maji ya bure kiasi gani, walipe na yeyote atakayekaidi apelekwe Mahakamani” alisisitiza Mkuu wa Wilaya

Sanjari na hilo Mhe. William, imeitaka jumuiya ya watumia Maji COWSO katika kata hiyo, kuhakikisha  kila mwananchi anayepata huduma ya Maji  anailipia jambo ambalo litaiwezesha jumuiya  kukusanya Fedha nyingi zaidi hivyo kuwa na uwezo wa kupeleka   Maji kwa wananchi wengine ambao bado hawajafikiwa na huduma hiyo muhimu kwa uhai wa binadamu.

Katika hatua nyingine, Mkuu wa Wilaya ametoa siku 60 kwa watu waliovamia chanzo cha Maji cha Nzivi, wawe wameondoka kwa hiari  kwenye  eneo hilo na endapo watakaidi kutekeleza agizo hilo, wataondolewa kwa nguvu ikiwa ni pamoja na kufunguliwa mashitaka.

Ukaguzi huo ulifanyika katika Kijiji cha Nyanyembe Kijiji ambacho kinatajwa kama Kijiji cha mfano kati ya vijiji 121 vya Halmashauri kwa usafi wa mazingira hususani matumizi ya choo bora.

Aidha, katika mashindano ya mwaka jana Kijiji cha Nyanyembe kilishika nafasi ya 07 kwenye mashindano ya usafi wa Mazingira na matumizi ya choo bora kati ya Vijiji vyote hapa nchini.