DAS Mufindi asisitiza kutolewa elimu juu ya ugonjwa wa usubi

Posted on: August 15th, 2024

Katibu Tawala Wilaya ya Mufindi Ndg.Reuben Chongolo ametoa rai kwa wahudumu wa afya kuendelea kutoa elimu kwa wananchi juu ya matokeo hasi ya madhara yatokanayo na usubi lengo ikiwa ni kusaidia jamii kuepuka madhara yatokanayo na usubi.

Rai hiyo ameitoa Agosti 15. 2024 kwa niaba ya Mkuu wa Wilaya ya Mufindi Mh. Dkt. Linda Salekwa, wakati wa ufunguzi rasmi wa kampeni ya ugawaji wa dawa za usubi kwa wananchi katika maeneo mbalimbali ndani ya Wilaya kampeni inayotarajiiwa kuanza Agostti 19 hadi 25, 2025.

Chongolo amesema kuwa  ipo haja ya kufanikisha zoezi hilo kwani kinga ni bora kuliko tiba hivyo ni vema wananchi wakujulishwa faida za kukinga ili kuwa na jamii ambayo ni salama kwani Wilaya ya Mufindi imepewa kipaumbele cha kutoa hudumu hiyo kutokana na kupakana maeneo ambayo tayari yana ugonjwa wa usubi lakini pia yana mbu wanaobeba vimelea vya ugonjwa wa usubi.

Akibainisha madhara ya usubi Mganga Mkuu wa Halmashauri ya Wilaya ya Mufindi Dkt. Fredrick  Jackoracha amesema ni pamoja na ngozi kuharibika, kutokuona vizuri na hatimaye upofu, kushindwa kufanya kazi ambapo hali hiyo hupelekkea hali ya utegemezi na umaskini katika kaya na jamii pamoja na unyanyapaa kwa wagonjwa wa usubi katika jamii.

Kwa upande wa dalili za ugonjwa huo Mganga mkuu amezitaja ikiwemo ngozi kuwasha sana, ngozi kuwa na ukurutu usiotibika, ngozi kuchakaa mithili ya ngozi ya kenge au mamba, kuwa na vinundu sehemu ya mifupa iliyojitokeza mwilini na ngozi kuwa na mabaka mabaka mithili ya mtu aliyeungua na moto au ngozi kuwa kama ya chui.