Mkuu wa Wilaya ya Mufindi ahimiza huduma ya Chakula cha mchana Shuleni

Posted on: January 8th, 2018

Mkuu wa Wilaya ya Mufindi ahimiza huduma ya Chakula cha mchana Shuleni.

Mkuu wa Wilaya ya Mufindi Mh. Jamhuri William, amewataka Walimu wakuu wa Shule za msingi za Halmashauri ya Wilaya ya Mufindi, kuwahamasisha Wazazi na Walezi kuchangia chakula cha Wanafunzi kwa kuzingatia sera ya Elimu bila malipo ili waendelee kupata huduma ya chakula  wanapokuwa shuleni, jambo ambalo limeonesha kuwa na mchango chanya kwa  kuchangia kupanda kwa Ufaulu wa Wanafunzi wa Shule za  Halmashauri hiyo.

Mkuu huyo wa Wilaya ameyasema hayo wakati wa tathimini ya  matokeo ya mtihani wa kumaliza Elimu ya Msingi (PSLE) uliofanyika mapema mwaka jana 2017, kupitia hotuba yake kwa Walimu wakuu wa shule 144 za  Halmashauri, ilyosomwa kwa niaba yake na Ofisa Tarafa wa Tarafa ya Ifwagi Bw. Daniel Mwaisela.

Jamhuri, amesema suala la utoji chakula cha pamoja kwa wanafunzi  shuleni, linasaidia kuleta usawa kati ya walionacho na wasionacho, kutunza muda na ratiba nzima ya Shule sanjari na kumuwezesha Mtoto kuzingatia na kuelewa anachofundishwa awapo darasani na ametoa rai kwa serikali za Vijiji na Mitaa kusimamia utekelezwaji wa suala hilo.

Akiwasilisha takwimu za ufaulu kwa mtihani wa darasa la saba uliofanyika mapema mwaka jana, Ofisa Elimu taaluma wa Halmashauri ya Wilaya ya Mufindi Bi. Mariam Ngala, ametanabaisha kuwa ufaulu  umepanda kutoka asilimia 80.39 mwaka 2016 mpaka asilimia 84.26 huku Halmashauri ya Wilaya ya Mufindi ikishika nafasi ya 32 kitaifa kati ya Halmashauri 185.

Siku ya tathimini ya matokeo ya mtihani wa darasa la saba kwa Halmahauri ya Wilaya ya Mufindi, ni tukio la kila mwaka linalowakutanisha Walimu wakuu wote wa shule 144, Maofisa Elimu kata kutoka kata zote 27 za Halmashauri ambapo kwa pamoja hutathimini matokeo ya darasa la saba kutunuku zawadi kwa Wakuu wa shule waliofaulisha vizuri zaidi pamaja na kuweka mikakati ya kufanya vizuri zaidi kwa mitihani ijayo.