Baraza la Madiwani Halmashauri Wilaya ya Mufindi Lapitisha Rasimu ya Mpango na Bajeti RUWASA na TARURA kwa mwaka wa fedha 2025/2026

Posted on: May 14th, 2025

Baraza la Madiwani Halmashauri ya Wilaya ya Mufindi chini ya Mwenyekiti wa Halmshauri Mh. Festo Mgina limepitisha Rasimu ya Mpango na Bajeti ya TARURA na RUWASA kwa mwaka wa fedha 2025/26.

Akiongoza kikao hicho Mh. Mgina ameutaka Uongozi wa TARURA na RUWASA kufanyia kazi maoni yote yaliyotolewa na baraza hilo ikiwemo kuongeza kasi ya ushirikishwaji wa viongozi wa ngazi ya kata wakati wa uanishwaji wa miradi ili kuendana na mahitaji ya maeneo husika.

Akiwasilisha Rasimu ya Mpango na Bajeti ya matengenezo ya barabara kwa mwaka wa fedha 2025/2026 Meneja  Wakala ya Barabara za Vijijini na Mijini Tanzania Wilaya ya Mufindi Injinia Nelson Maganga amesema  TARURA-Halmashauri ya Wilaya ya Mufindi imepanga kutumia jumla ya Tshs 5,938, 513, 460.49 kutoka vyanzo mbalimbali vya fedha ikiwemo matengenezo, mfuko wa maendeleo, bajeti ya nyongeza na tozo ya mafuta.

Aidha amebainisha kuwa kwa mujibu wa mfumo wa DROMAS hali ya mtandao wa barabara ni ya kuridhisha kwani mpaka sasa Halmashauri ya Wilaya ya Mufindi ni 62% ya mtandao wote wa barabara unapitika kipindi chote cha mwaka, huku 38% inapitika kipindi cha kiangazi tu na kipindi cha masika inapitika kwa shida na wakati mwingine kutopitika kabisa.

Kwa upande wake Meneja Wakala wa maji na usafi wa mazingira vijijini  Wilaya ya Mufindi(RUWASA) Injinia Happy Mrisho amesema kwa mwaka wa fedha 2025/2026 bajeti iliyotengwa na kupitishwa kwa Wilaya ya Mufindi ni Tshs 3,083,515,209 kwa vipaumbele vya ukamilishaji wa miradi inayoendelea pamoja na miradi mipya iliyoshindwa kutangazwa ndani ya mwaka wa fedha 2024/2025 kutokana na ucheleweshaji wa mapokezi ya fedha.

Miradi inayoendelea kwa sasa ni katika maeneo mbalimbali ikiwemo Ifwagi, Ihalimba, Ikongosi, Chogo, Ideete, Ihanzutwa, Sadani Kihata, Mbalamaziwa, Nyololo(Njojo na Lwing’ulo), Malangali, Itimbo, Lufuna-Kibao, Kisada, Ugute-Kitelewasi na Mgololo huku Mtambula, Igombavanu na Matanana ikiwa ni miradi mipya.